(36) إنْعِزالٌ

-  يعنى لو ماكنتش أنا أجيلك وأسأل عليك والا تعبرنى ....

-  أنا مقصر فى حقك .. أنا عارف .. بس أنا لا باخرج ولا باروح ولا باجى .... يادوب على قد الشغل ..

-  ماأنا شايف إنك حابس نفسك حبسه سوده ... حايجيلك إكتئاب فى الأخر ...

-  حا !!!!

-  أنت ليه بتعمل فى نفسك كده ؟؟ 

-  مش عارف .....  مش راضى عن نفسى .. مش راضى عن اللى حواليا .. حاسس إنى موجود فى

   المكان الغلط .. والزمان الغلط .... أنا أستحق أفضل من كده .....

-  مش دى إختياراتك ؟؟؟

-  لأ مش إختياراتى ... دى الإختيارات اللى الحياة بتحطها قدامى ... وكلها سيئه .. وأنا باختار أفضلها ..

   بذمتك ... فيه قد أيه ناس فى مراكز مرموقه .. وهما جهلا وتافهين ومكانهم صندوق الزباله !!!

   وفيه قد أيه ناس محترمه .. على قدر العلم والموهبه .. وممكن يفيدوا المجتمع .... مدفونين فى

   وظائف حقيره .. أو مش لاقيين عمل !!!!

-  أنت ليه بتعذب نفسك !!! ياترضى بالواقع .. ياتغيره ...  الحسره مش حاتفيدك .. بالعكس حاتدمرك ..

-  أنا مش قاعد أبكى على حالى .. أنت فهمت غلط ... أنا بس مش قادر أندمج فى المجتمع .. أو أتعامل 

   مع الناس ... علشان كده قافل على نفسى ....

-  ده إستسلام وخنوع .. لازم تغير حياتك ... أنت بتعمل أيه بعد مابترجع من الشغل ؟؟

-  ولا حاجه ... مش بالحق أعمل أى حاجه .. الوقت بيعدى بسرعه رهيبه ... اليوم بقى كأنه ساعه ..

   والاسبوع كأنه يوم ... والشهر كأنه أسبوع ... والسنين بتجرى .. والعمر بيجرى ....

   إلا ساعه ماتحط رجلك فى الشغل ... تحصل المعجزه ... الدقيقه تبقى ساعه .. والساعه تبقى 

   يوم ... واليوم يبقى سنه ... أه والله زى ماباقولك ...

   بادخل الحمام فى البيت وأخرج علطول .. الاقى عشر دقايق عدوا .. إزاى .. مش فاهم ...

   فى الشغل أدخل الحمام .. وافضل أتلاكع .. وأضيع الوقت .. وأخرج .. الاقى الساعه مشيت دقيقه ..

-  أنت ليه ماتجوزتش لغايه دلوقتى ... أو ليه مش بتتجوز ؟؟

-  علشان ماعنديش حاجه أقدمها لأى واحده ست ... ماقدرش أسعد أى ست .. ولو خلفت .. ماعنديش

    حاجه اقدمها لأاولادى ...

-  قصدك حاجه ماديه ؟

-  ماديه .. ومعنويه ..... أنت مش شايف المجتمع اللى عايشين فيه بقى عامل أزاى !!!

-  أنت لازم بأى شكل من الأشكال تتعرف على واحده بنت ... لازم تخرج من قوقعتك دى ...

   مبدئيا .. حاتروح لواحده محترفه .. تطلع منك الطاقه السلبيه اللى ملياك دى .. وتجدد لك نشاطك ..

   وتفكرك بمتعه الحياه .. وتفتح نفسك للبنات .. علشان تخرج وتتعرفلك على واحده تشاركك حياتك ..

-  أنا مش بتاع الحاجات دى ...

-  حاجات أيه اللى أنت مش بتاعها ؟؟

-  أنا ماشربش من كوبايه طوب الأرض شرب منها .. وتف فيها كمان ...

   دى زباله الستات ...

-  لأ أنت فاهم غلط ...

-  لا فاهم صح ... بس اللى مش قادر افهمه ... أزاى الستات دى بتقدر تعمل كده !!! 

   المفروض إن الست عاطفيه بطبعها .. بتسلملك نفسها لما بتنبهر بيك .. وتحبك .. وتتعلق بيك ..

   المحترفات دول .. محبوسين فى أوضه ٢٤ ساعه ... وكل شويه يدخلولهم راجل جديد .. 

   مش قادر أفهم أزاى الواحده فيهم بتقدر تحسسك وكأنك أول راجل فى حياتها ... وكأنها ماشافتش

   رجاله قبلك ... وتفهمك إنها عمرها ماستمتعت مع حد فى حياتها .. زى ماستمتعت معاك !!!

-  هههههههههه شغلهم بقى .. أكل عيشهم ...

-  الرجاله مايعرفوش يعملوا كده ... مافيش راجل يقدر يشتغل الشغله دى ... 

-  ماتغيرش الموضوع ...

-  لأ بس علشان مايفضلوش يغنوا علينا .. ويقولولنا إن قلب الست مايسعش إلا راجل واحد بس ...

-  قوم غير هدومك علشان تيجى معايا ...

-  أجى معاك فين .. لأ طبعا ... 

-  صدقنى حاتفوق وحاتبقى واحد تانى خالص ..

-  لو سمعت كلامك حاكره نفسى ..

-  بالعكس .. دانت حاتشكرنى ..

-  وبعدين أنا منحوس ... على حظى أنا .. حايطب البوليس علينا .. وحادخل السجن .. وحاتفضح ..

-  ههههه .. بوليس مين ياعم ... أنت مش عايش فى الدنيا ؟؟  البوليس هو اللى بيدير الأماكن دى ..

-  أنت بتقول أيه ؟؟

-  أنت للدرجه دى مش متابع خالص !!!

   حاجتين هما اللى بيعملوا فلوس ... المخدرات .. والدعاره ... 

   فى بلاد كتيره .. البوليس هو اللى مسيطر على الحاجتين دول .. بيحميهم وبياخد نسبه ...

   عندنا بقى .. البوليس بيحمى تجار المخدرات .. وبياخد منهم نسبه .. لكن الدعاره هو اللى 

   مسيطر عليها .. وبينظمها .. والعائد بتاعها كله بيتقسم مابينهم ...

-  مش ممكن ...

-  خد التطبيق ده حطه على الموبايل بتاعك .. الداخليه هى اللى عملاه ...

    أول حاجه حايسألك .. عايزها محلى والا مستورد ...تختار ... بعدين عايزها عندها كام سنه ..

    تختار .. عايزها تجيلك البيت .. والا أنت اللى حاتروح عندها .... وبعدين يسألك أذا كان عندك 

    شروط معينه .. أو بتفضل حاجه معينه ... وبعد كده يبتدى عرض الصور ...

    تختار اللى أنت عايزها .. يكتبلك السعر .. ويحددلك الميعاد .. بس كده ..

    كأنك بتشترى بيتزا ...

-  أكيد بتهزر ..

-  ماهو التطبيق معاك أهو ... أدخل وشوف بنفسك ... بس أنا حاخدك تعاين على الطبيعه ..

   علشان تبقى قدام الأمر الواقع .. وماترجعش فى كلامك ...

-  دا أيه الهنا اللى أحنا فيه ده ... لهم حق الشباب يبطلوا يتجوزوا ...

   وبياخدوا كام بقى على كده !!!

-  على حسب إختيارك ... فيه البنات الرخيصه .. اللى نص ساعه وتقلبك .. وفيه البنات اللى بتقعد

    معاهم ساعتين ثلاثه .. وفيه اللى تبات معاك  .. وفيه اللى تخرج معاك .. وتتعشوا سوا ...

    أى حاجه تخطر على بالك موجوده ... بس كل حاجه بثمنها ....

-  والناس كلهم عارفين الحكايه دى وماحدش أعترض ؟؟

-  تعترض .. تبقى أخوان ياحلو .. الله يرحمك ..

   العمليه مش عمليه فلوس ... دى تعليمات ... الشباب لازم يتم تدميره .. مش بس أخلاقيا .. 

   ونفسيا .. وعلميا .. وصحيا .. وتعليميا .. وثقافيا ..

   خش على الفيس بوك وأنت تشوف ... ماعدتش حد بيعرف يكتب عربى .. 

   النهارده لقيت واحده كاتبه .. بعد ماخلصت درس الأنجلش أغمى عليا .. قعدوا اصحابى يفوءو 

   فيا أدام المعهد .... 

   مكسوفه تكتب أنجليزى .. وكاتبه إنجلش .. أنما مش مكسوفه تكتب يفوقوا و قدام بالهمزه ...

   وأنه يكتبوها أنو ... وأهله يكتبوها أهلو ... وبقت مسخره ....

-  طب لما أنت شايف اللى بيحصل .. بتحاول ليه تخلينى أرجع أندمج مع الناس تانى ...

-  علشان ماتتجننش .. زى ماقولتلك .. ياتتقبل الواقع .. ياإما تغيره ...

   طالما مش قادر تغيره .. يبقى تتقبله وتندمج فيه علشان ماتتجننش ...

-  إنك تعيش شخصيه مش بتاعتك ... وتقول كلام أنت مؤمن بعكسه ... وتعمل حاجات بتتعارض مع 

   مبادئك وأخلاقك ... هو ده الجنان الحقيقى ....

   على الأقل الجنان بتاعتى جنان مشرف ... إنما الجنان بتاعك جنان مخزى ... 

(35) إنْتِقامٌ

-  ياإبن الكلب .....

   وحياة أمك .....

-  فيه أيه !! أيه اللى حصل !!!!

-  أفتحى باب العربيه ندخله جوه ... 

-  ندخل مين !! فهمينى أيه اللى حصل ... مين ده ؟؟

-  دلوقتى أفهمك ... أفتحى الباب الورانى ... ساعدينى بسرعه قبل الناس ماتتلم علينا .....

-  مش حاأركب معاكى الا لما تفهمينى إنتى بتعملى أيه ...

-  أستنى بس ندخل فى شارع هادى قبل مايفوق ... وحاأقولك كل حاجه ....

   بصى .. أنا معايا حبل فى شنطه العربيه .. حاجيبه .. وحاأربط إيديه ورجليه .. وأكمم بقه ....

   كل اللى عايزاه منك .. إنك تساعدينى نحطه ورا فى الشنطه ...

-  لا طبعا .. مش حاأساعدك فى أى حاجه ... أنا رايحه أخد تاكسى من على الشارع العمومى ومروحه ...

-  خلاص .. ماتعمليش حاجه ... أنا حاأجرر أمه لوحدى ...

   دقيقه واحده بس .. قبل مايفوق .. والا حد يعدى .... 

   
   إبن الكلب ده ... بافتح باب العربيه .. لقيته دخل ايده بين رجليا ... بالف بسرعه .. راح كوعى إتخبط

   فى دماغه .. لقيته وقع على الأرض .. الظاهر إتخبط فى الرصيف .. أغمى عليه ...

-  وأنا كنت فين ؟

-  كنتى بتلفى علشان تركبى من الباب التانى ...

-  كان بيتحرش بيكى يعنى !!!!

-  بصى .. أنا ماباحبش كلمه تحرش دى ... كلمه غبيه مالهاش أى علاقه باللى بيحصل ....

   يتحرش بيكى .. معناه بالبلدى .. يجر شكلك .. يستفزك ....علشان يتخانق معاكى ....

   إنما اللى بيحصل مع الستات ده .. أسمه تعدى .. إعتداء ... سواء باللفظ .. أو بالفعل ...

   علشان أنا باتخنق من اللى بيغلط فى اللغة العربيه ...

-  ده وقت فلسفه !!!  

   إنتى دلوقتى ربطيته وحطتيه فى شنطه العربيه ليه ؟؟؟

-  علشان حاأعلمه الأدب ... حاأديله درس ماينساهوش طول عمره ...

-  درس أيه وهبل أيه ... نوديه القسم نعمله محضر وخلصنا ...

-  لا .. فى القسم حايضيع مستقبله ... ده لسه صغير .. وممكن تكون دى أول مره يعملها ...

-  خلاص أديله قلمين .. وسيبيه يروح لأاهله ...

-  مش كفايه ... أنا متغاظه منه قوى ....

-  وناويه على أيه !!!

-  الأول حانروح ناخد البنات ... ونطلع أحنا الخمسه على فيلتنا اللى فى العجمى ....

   حانغمى عنيه .. وحانربطه فى السرير ... وحانغتصبه .. لغايه مايجيب دم ...

-  إنتى شاربه حاجه ؟؟؟؟   أنا سايباكى ومروحه ... ماليش دعوه بيكى ...

-  ماتبقيش عيله ... أحنا مش كل حاجه بنعملها سوا ... أنا عمرى ماأتخليت عنك ...

-  المره دى إنتى أتجننتى .. وعايزه تدخلينا السجن ... دى جريمه خطف ياماما ... وخطف قاصر ..

-  أشمعنى هما يخطفونا .. ويغتصبونا !!! أحنا كمان ممكن نخطفهم .. ونغتصبهم .. ونعلمهم الأدب ...

-  حاجه من الأثنين .. ياتفتحى شنطه العربيه .. نفك الواد ده ونسيبه فى حاله .. ياحاأمشى وحاأسيبك ...

-  طب أدينى فرصه بس أشرحلك وجهه نظرى .. لو ماقدرتش اقنعك .. أوعدك أنى حاأسيبه ...

-  وجهه نظر أيه !!  هو أنا لسه حأعرفك النهارده !!  ده أحنا مافيش حاجه مابنقولهاش لبعض ..

   الواد فاق وعمال يخبط برجليه ....

-  يتفلق ... أنا عايزه أعيش التجربه دى .... حاتفرق معايا قوى .. وحاأندم لو ضيعت الفرصه دى ...

-  ومالقتيش إلا العيل ده تجربى فيه ... طب أخطفى واحد عليه القيمه ... على رأى المثل .. إن سرقت

   أسرق جمل .. وإن خطفت إخطف قمر ... 

-  حاأعملها وحياتك ... حاأخطف واحد أجنبى .. أشقر وعنيه زرقا ...

-  إنتى عبيطه يابت إنتى !!!  هو فيه بنت تغتصب راجل !!!
-  وأيه المشكله ؟؟
-  الطبيعه عملتنا كده ... شوفى الحيوانات .. اللى لسه على طبيعتهم زى ماربنا خلقهم .. 
   عمرك شوفتى قطه ماسكه قط من قفاه .. وشله حركته .. وبتاخد حقها منه بالعافيه !!!! 
   عمرك شفتى أسد قاعد على الأرض .. ومراته هى اللى راكبه فوق منه !!!!
   أحنا كمان كده .. طبيعه الراجل .. وتركيبه جسمه .. ماتخليش الست تقدر تغتصبه الا إذا كان قادر ...
-  الكلام ده كان زمان .. قبل مايكتشفوا الفياجرا ... 

   دورى على النت وإنتى تشوفى كام ست إغتصبت راجل ...

   واحده منهم عندها محل كوافير .. وبتلعب كراتيه ... دخل حرامى يسرقها .. ضربته وحبسته فى

   أوضه ٣ أيام .. تديله فياجرا وتغتصبه ... طلع من عندها على المستشفى عدل ... ههههههه
-  إنتى فاكره إنك لما تغتصبى واحد راجل .. تبقى بتعاقبيه !!! إنتى بتديله اللى هو عايزه ...
-  إنك تاخدى حاجه من حد غصب عنه ... ده مش عقاب ؟؟
-  إغتصاب الست للراجل .. مافيهوش أى إهانه للراجل ... بالعكس .. ده ممكن يتفاخر بيه ..
   ويطلع فى التليفزيون يعمل بيه دعايه لنفسه كمان .... بعكس الست ... إغتصاب الراجل لها .. يعتبر
   منتهى الإهانه ليها ... 
   الراجل مابتفرقش معاه الست اللى بيمارس الحنس معاها ... أنما الست بطبيعتها عاطفيه ... 
   مش ممكن تسلم نفسها الا للإنسان اللى بتحبه ....
-  دى حاجه مالهاش أى علاقه بالعاطفه ... ده مجرد إنتقام ....
-  إنتى أيه اللى طلع الفكره دى فى دماغك فجأه كده !!! لما الواد مد إيده عليكى ... والا إنتى أساسا

   الفكره كانت مسيطره عليكى !!!!

-  بصراحه .. الفكره مسيطره على من فتره ... ونفسى أنفذها مع واحد معايا فى الشغل ... شايف

   نفسه شويه ...

-  كسفك ؟؟

-  حرق دمى ... 

-  طلبتى منه تخرجوا سوا ومارضاش ؟؟؟

-  عرضت عليه أوصله ....

-  تفتكرى حاييجى اليوم .. اللى البنات هما اللى يعاكسوا الرجاله ... ويخطفوهم ويغتصبوهم !!!

-  أكيد طبعا ... ماهو ماعدتش حد بيتجوز ... والبنات بقوا أكتر من الرجاله ... مسيرها حاتبقى

   غابه ...

-  قومى نطلع الواد من الشنطه ... نديله قلمين ونهدده شويه .. ونسيبه يمشى ...

-  إنتى ليه كل ماأبقى عايزه أعمل حاجه .. تكسرى مقاديفى ؟؟؟

-  حانعملها .. بس مش مع العيل ده .... أنا كمان نفسى أعيش التجربه دى معاكى ....

-  الواد اللى معايا فى الشغل ... عايزاه يلحس جزمتى ... ويترجانى ... 

-  إحلمى إحلمى .. قومى نطلع الواد خلينا نروح ... الساعه بقت ١١ .... 

   

(34) شَجاعة

-  إنتى بتقولى أيه ... أنا مش مصدق ودانى ...

   أنا إتجوزتك علشان إنتى إنسانه محترمه .. ومتدينه .. ومنقبه ..

-  وأنا إتجوزتك علشان أنت أنسان محترم .. ومتدين .. وسايب ذقنك ومخفف شنبك ...

   بس ده مالوش علاقه باللى أنا باقوله ... مايتعارضتش مع اللى أنا باقوله ...

-  أزاى مايتعارضتش !!! ده يتعارض .. ويتناقض .. ويتنافى كمان ...

-  أنت غلطان صدقنى .... أهدا شويه وأنا حاأقنعك ...

-  إنتى جبتى الحاجات دى منين ؟؟؟ إنتى بتتفرجى على أفلام إباحيه ؟؟؟ 

-  ياحبيبى ... مش معنى إنى إنسانه متدينه ومنقبه .. إنى أقفل على نفسى .. وأعزل نفسى

   عن العالم الخارجى ... أنا متعلمه ومثقفه .. وباقرا فى جميع الموضوعات .. وباتابع اللى بيحصل 

   فى الدنيا .. 

   بس ده مالوش علاقه بموضوعنا .. لأنى مش باطلب منك حاجه أنا شوفتها .. أو قريت عنها ...

   أنا باكلمك عن إحساسى أنا ... عن إحتياجاتى .. عن سعادتنا ونجاح حياتنا الزوجيه ...

-  وهو نجاح حياتنا الزوجيه مايكونش إلا بالشذوذ اللى إنتى بتطلبيه ده !!!!

-  ياحبيبى ده مش شذوذ ... أنت فاهم غلط ... الشذوذ هو كل حاجه بتخرج عن القاعده ...

   أو عن المألوف ...

    السؤال هنا ... أى قاعده ؟؟   والمألوف لمين ؟؟؟   

   اللى بيحصل فى أوضه النوم بينى وبينك .. بيتبع قاعده واحده ... إننا مانعملش حاجه تغضب ربنا ...

   وأنا ماطلبتش منك حاجه تغضب ربنا ... أنا باطلب منك أنك ماتبقاش تقليدى ... تخرج من الروتين

   اللى أنت ماشى عليه ده .. نبطل نطفى النور وندخل تحت اللحاف وكأننا بنعمل حاجه عيب ...

   لأنها بقت حاجه ممله جدا ... لو إستمرينا على كده .. مش حايبقى فيه إثاره .. وحاتتحول المعاشره

   إلى شكل من أشكال الإغتصاب ....

   لازم يكون فيه خيال .. فيه تجديد ... فيها أيه يعنى لما نلعب مع بعض .. الدكتور والممرضه مثلا !!!

   أو الضابط وبائعه الهوى .... أو المدير والسكرتيره !!!!

-  إنتى بتخرفى بتقولى أيه !!!  

   واضح إنك وقعتى ضحيه الغرب الكافر .. وأفكارهم الشاذه اللى بيسوقوها فى أفلامهم الأباحيه ... 
   علشان يدمروا مجتمعنا الإسلامى .. ويبوظوا أخلاق الشباب .. ويعلموهم الفسوق والأنحلال ....

-  أسمعنى بس .. مش كل حاجه فى الدنيا ياإما أبيض .. ياإما أسود .. زى ماأنت فاكر ... 

   مش كل حاجه ياإما حلوه .. ياإما وحشه .. ساعات الحاجه الحلوه مابتبقاش حلوه قوى ..

   والحاجه الوحشه مابتكونش وحشه قوى ... ساعات الخير بيبقى فيه نسبه من الشر ...

   والشر بيكون فيه نسبه من الخير ...

-  مش فاهم عايزه تقولى أيه ....  

-  يعنى البنات مش ياإما بنات مؤدبه ومحترمه ... ياإما بنات صايعه ومجرمه .. 

   ممكن البنت المؤدبه المحترمه اللى بتحافظ على نفسها وسمعتها قدام الناس ... تبقى صايعه

   ومجرمه مع جوزها فى اوضه النوم ... ده مش عيب .. وخصوصا وأن كان غرضها هو إسعاد زوجها ....     

   أنا سعيده جدا بجوازى منك .. لانك انسان عندك أخلاق .. وبتعاملنى بمنتهى الادب والإحترام .. 

   بس انا مش عايزاك تعاملنى باحترام فى اوضه النوم ... مثل ياأخى ... مابتعرفش تمثل ...

   نفسى فى السرير تبقى مجرم وصايع .. نفسى تضربنى وتشدنى من شعرى .. وتقولى الفاظ بذيئه

   وقليله الأدب ... عايزاك تقطعلى هدومى .. وترمينى على السرير .. وتحط الكلبشات فى ايديا ...

   حسسنى إنى والا حاجه ... زهقت من كتر الإحترام ... عايزه أحس بأنوثتى ....

-  معقوله يكون عندك إنفصام فى الشخصيه ؟؟؟

-  ياحبيبى ... زى ما الناس مختلفه فى اشكالها وشخصيتها .. مختلفه كمان فى إستجابتها للإثاره 

   الجنسيه .. وأوضاع الإستمتاع .. والطرق والزمن اللازم للإشباع ... أكيد أنت عارف الكلام ده ..

   أنا كل اللى باعمله إنى بادلك على الطريقه اللى تسعدنى بيها .. علشان اقدر انا كمان اسعدك ..
   وماتبقاش حياتنا رتيبه وممله .. وعلشان مانزهقش من بعض ...

   كل اللى طلباه منك .. أنك فى السرير تتنازل عن وقارك وكبريائك .. تنسى تقاليد المجتمع .. 

   وإن أنت الراجل وأنا الست ... ماتبقاش عامل زى الأب اللى خايف يلعب مع أولاده الصغيرين ..

   لحسن يفقد أحترامهم له .. وخوفهم منه .. ومايسمعوش كلامه بعد كده ... دى حاجه ودى حاجه

   تانيه خالص ... تأكد من كده ..
-  إنتى غلطانه ... العلاقه الزوجيه أساسها الإحترام المتبادل فى المقام الأول .. إذا فقدنا إحترامنا
   لبعض .. وبدأنا نضرب بعض .. ونشتم بعض .. ونقل أدبنا على بعض ... نظرتنا لبعض حاتتغير تماما ..

   أنا ماقدرش ابصلك بمعيارين ... الصبح أشوف فيكى الزوجه الوقوره .. العاقله .. المحتشمه .. اللى
   حاتربيلى أولادى أحسن تربيه ... وباليل اشوف فيكى البنت الرخيصه .. المستهتره .. المبتذله .. 
   الفاقده للأدب والحياء ..  
   إنتى ماكنتيش كده ... أيه اللى غيرك ؟؟   

-  هو أحنا ليه بنحب ندفن راسنا فى الرمل زى النعام !!!!
   كل اللى عايزاه الست من جوزها .. أنه يصرف على البيت .. وأنه مايتجوزش عليها ...
   وكل اللى عايزه الراجل من مراته ... انها تطبخله .. وتغسله هدومه .. وتربيله العيال ...
   الراجل يرجع من الشغل ينام شويه .. يصحى ينزل يقعد مع أصحابه على القهوه ..
   والست لغايه ماتخلف .. وتلاقى حد تتخانق معاه .. طول النهار .. يا قاعده مع الجيران .. يا بتتكلم 
   فى التليفون .. يا بتتفرج على التليفزيون  ..

   الراجل يشتكى لأصحابه من .. غلطه عمره .... والست تشتكى لصحباتها من .. ميله بختها ..
   طب ليه ؟؟ 
   ليه المتجوزين بيستسلموا وبيسيبوا حلم حياتهم يتحول لندم ولغلطه عمر ؟؟  
   ليه مايبقاش فيه شئ جميل مشترك بين الزوجين ... يخليهم متعلقين ببعض علطول .. ومايسيبش
   فرصه للزهق والملل انه يدخل بينهم  ؟؟؟
-  والشئ المشترك ده هو المسخره بتاعه الدكتور والممرضه دى ؟؟؟
-  المسخره دى مجرد فكره تقربنا من بعض اكتر .. وتكسر الروتين .. وتعمل تجديد فى حياتنا ...
-  ده أحنا مابقلناش غير ٣ شهور متجوزين ....
-  صحيح .. بس كل أيامنا شبه بعضها ... وكل ليالينا طبعا ... وأنا مش ماكينه .. تحط الفلوس تنزلك
   علبه البيبسى .... خلينى أفكر فيك طول الوقت وأتجنن عليك ...
-  حاضر ...
-  حاضر أيه ... بتهرب من المناقشه !!!
-  حاضر .. النهارده مش حانطفى النور .... ومش حانستخبى تحت اللحاف .... 
-  مش كفايه ...
-  أمال عايزه أيه ؟؟؟
-  النهارده نفضل طالعين نازلين بالاسانسير ... بعد الجيران ما يناموا ...
-  نععععععععععععم .....  لا ده إنتى أتجننتى خالص ...
   أنا نازل ... ولما أرجع .. حاجه من الأثنين ... حاتعقلى وترجعى زى ماكنتى ... حاتروحى تقعدى
   عند والدتك لغايه أعصابك ماتهدى ...
-  طب فى البلكو ...
-  ولا كلمه .... قال اسانسير قال ...
-  .....
-  شششششششششش
   حاطبق عليكى شرع ربنا  ... وأهجروهم فى المضاجع ...

-  طب ماهو قال وأضربوهم .... مش عايز تضربنى لييييييييييييه !!! 

-  ........
-  أستنى أقولك بس ....