(37) إنزلاق

- أيه ده !!!  هو حضرتك مصرى ؟؟
- أيوه ..
- مش باين عليك خالص ... 
  بقالك قد أيه هنا ؟؟
- أكتر من ٣٠ سنه ...
- ٣٠ سنه ... يابختك ...
- وأنت بقالك قد أيه ؟؟
- ٣ شهور ...
- بتشتغل ؟؟
- مساعد فى كافيتريا ... 
- وعايش فين ؟؟
- كنت فى الأول ساكن مع شباب مصرى .. بس ماأستريحتش معاهم ... بعدين طلبت من بنت من اللى بيشتغلوا معايا إنها
  تساعدنى الاقى شقه صغيره على قدى ... قالتلى تعالى اسكن معايا ...
- وطبعا بتنام معاها !!!
- على ماأقف على رجليا .. أعملى قرشين .. وأتعلم أتكلم اللغه شويه .. وبعدين حاأسيبها ..
- وأيه السبب ؟؟
- ماهياش حلوه قوى .. وأكبر منى .. والبنات هنا تهبل .. وعلطول بيبصولى .. وممكن كل يوم أعرف واحده ...
- دى حقيقه .. البنات هنا بيحبوا المصريين السمر .. وحايطاردوك .. ومش حاتلاحق .. خصوصا وأنت لسه شاب صغير ...
- أكيد حضرتك .. كل السنين دى .. عملت اللى مايتعملش ...
- عايز تسمع قصتى ؟؟
- ياريت ...

- أنا كنت زيك كده بالظبط أول ماجيت .. مبهور بجمال البنات .. وبالحريه .. وبسهوله كل حاجه .. 
  ماكنتش باضيع أى فرصه .. مافيش بنت إشتغلت معايا إلا وعدت على سريرى .. كل يوم سهر للصبح فى الديسكوهات..
  أتعرف على بنات وأخدهم شقتى .. ماكنتش باعتق ... نمت مع بنات بعدد شعر راسى ... قبل ما شعرى يقع ...
  وماكانش كفايه .. بدأت أروح محلات الاستربتيز .. كانت لسه فى عزها .. كانت البنات اللى بترقص من أوربا .. إنجلترا و
  المانيا وإيطاليا .. أحلى بنات .... دلوقتى بيجيبوا بنات من اوربا الشرقيه .. رومانيا وبلغاريا وحاجات تعبانه ...
  كان فيه محل .. فيه واحده إنجليزيه مش معقوله .. أجمل واحده فى البنات كلهم .. عندها ٢٠ سنه .. وجسمها كأنه
  تمثال مرمر .. خطيره .. ماحصلتش ...
  أول ماشفتها ماقدرتش انزل عينى من عليها ... أول ماخلصت رقص لقيتها جايه تقولى تحب أقعد معاك ؟ .. من غير ما
  أفكر قلتلها لأ ... 
  حرقتها .. وهى اللى كل الزباين بيتخانقوا عليها ... مشيت وهى متضايقه قوى ....
  بعد شويه .. طلبت من المتر انه يقولها تيجى ترقص لى .. رقصتلى وكأنى الواد بتاعها ... مع أنه ممنوع أنك
  تلمس البنت اللى بترقصلك .. هى سابتنى أمسكها من أى حته أنا عايزها ....
  بقيت أول ماأدخل المحل .. تسيب كل الزباين وتيجى تقعد معايا .. لغايه لما أمشى .. ماكانتش تخلى أى بنت تانيه تقرب 
  منى .. طبعا أنا كنت فرحان وعلطول هناك ...
  برضه حسيت أنه مش كفايه .. قررت أروح بيوت الدعاره .. مش حاتصدق قد أيه البنات اللى كانوا بيشتغلوا الشغلانه دى
  أيامها كانوا ملكات جمال .. كانت روسيا سمحت للناس أنهم يسافروا .. بعد ماأتفككت روسيا على إيد جورباتشوف ..
  بدأت البنات الروس الجمال قوى تسافر أمريكا ويشتغلوا عارضات أزياء .. بقية البنات كانوا بيطلعوا على أوربا بفيزا
  شهر .. يشتغلوا فى الدعاره ويحوشوا فلوس ويرجعوا روسيا ...
  معظمهم كانوا طالبات فى الجامعه .. بنات على مستوى مش أى حاجه ...
  جربت بيوت الدعاره اللى بتدفع فيها ١٠و ١٥ يورو للبنت .. لغايه الفيلات الخاصه اللى البنات فيها ب ١٥٠٠ يورو فى
  الليله الواحده .... ماسيبتش حاجه ... 
  كان فيه مكاتب للموضوع ده .. كنت أنا زبون فى مكتب منهم .. وقت ماانا عايز .. أتصل بيهم يبعتولى أحلى بنات عندهم ..
  موديلات بمعنى الكلمه ... وتقعد معاك لغايه لما تزهق منها .. ساعتين ثلاثه .. ب ٦٠ يورو ...
- وكنت بتجيب الفلوس دى منين ؟
- أنا كان مرتبى أيامها ١٨٠٠ يورو فى الشهر .. وبعدين أنا ماكنتش بادفع فلوس كتير فى البنات .. لأن كان عندى علاقاتى
  اللى مش بتكلفنى حاجه ...
  بس بالرغم من كده .. وبعد ١٥ سنه شغل ماكونتش محوش والا مليم ... ومرتبى ماكانش بيكفينى .. وكنت باخد قروض
  من البنك ... تصدق ؟؟؟
- مش ممكن ... ده أنت المفروض بالمرتب ده تكون عملت مبلغ كبير فى البنك ...
- كنت حاأتجنن ... مش عارف الفلوس بتروح فين ... لغايه مره كنت باتكلم مع واحد صاحبى .. سورى مسلم .. الله يمسيه
  بالخير ... جت سيره الفلوس .. باقوله دا أنا باخد قد كده مرتب .. ومديون للبنك بمبلغ كبير ... تفتكر يقولى إيه ؟؟؟
- أيه ؟؟
- قالى الزنا .... أنت مش عارف إن الزنا يجيب الفقر ....
  كانت أول مره أعرف فيها إن الزنا بيجيب الفقر ... بجد .. 
- أنا كمان أول مره اسمع الحكايه دى ...
- سألت واحد صاحبى تانى .. قالى أنت مش عارف إن فيه حديث بيقول : بشر الزانى والزانيه بفقر ولو بعد حين !!! 
  أتضح بعد كده أن الحديث ده غير صحيح ... بس لقيت أيه فى القرأن بتقول : الشيطان يعدكم الفقر ويأمركم بالفحشاء

  والله يعدكم مغفره منه وفضلا والله واسع عليم ..

  المهم ... فوقت .. وقررت الإستقامه .. وقطعت كل علاقاتى بالبنات اللى كنت أعرفهم ... ورجعت أصلى وألتزم ...
  سبحان الله .. بدأت أحوش .. ولأول مره فى حياتى يبقى معايا مبلغ محترم ... 
- ربنا طرح فيه البركه ..
- لأ البركه دى موضوع تانى خالص ... البركه من خلال تجاربى أنا .. مرتبطه بالصدقه ... كل ماتتصدق .. كل مافلوسك 
  تبقى فيها البركه .. حتى ولو كان دخلك صغير ومش بيكفيك ... تصدق بأى مبلغ ... حاتلاقى مرتبك مهما تصرف منه
  مش بيخلص ... دى تجربتى الشخصيه ... والله أعلم طبعا ...
- تمام .. وبعدين !!
- قعدت بتاع سنه منتظم ومنضبط ومواظب على الصلاه ... جه الصيف .. رحت أشتغل فى جزيره .. جت تشتغل معايا
  بنت دانماركيه .. مش حاأقولك على جمالها ... بتدرس فى الجامعه هناك .. وجايه تشتغل الصيف علشان تحوش
  قرشين .. والسكن فى الجزيره غالى قوى ...
  طلبت منى إنها تسكن معايا فى الأوضه بتاعتى ... ماقدرتش أقول لأ ... ضعفت ... أتطورت العلاقه بينا ... حبينا بعض ...
  رجعت للزنا تانى ....
  المره دى العقاب كان أشد ... خلص الصيف .. هى سافرت تكمل دراستها .. وانا قعدت أدور على شغل ١١ شهر ...
  خلصت كل فلوسى اللى كنت محوشها .. ورجعت أخد قرض من البنك علشان أقدر أعيش .. مش كفايه الزنا .. دخلت
  فى الربا كمان ... 
  بقيت مديون للبنك .. كل شهر أدفع الفوائد .. والدين زى ماهو مش بينقص ... ومديون لصاحبه البيت إيجار ١٦ شهر ..
  غير فواتير الكهرباء والميه والأنترنت ...
  نويت التوبه للمره الثانيه .. وبعدت عن البنات .. ومسحت كل أفلام البرنو والصور اللى كنت محتفظ بيها على الكمبيوتر ...
  وواظبت على الصلاه ... وبقيت أمشى فى الشارع باصص فى الأرض .. علشان أحمى نفسى من أى مغريات ...
  كرمنى ربنا بشغله بس فى بلد تانيه .. قعدت سنتين أشتغل وأسدد ديونى .. ووقفت على رجليا تانى .. كنت مواظب على 
  الصلاه وماشى كويس .. لغايه لما واحده معايا فى الشغل حطيتنى فى دماغها .. المره دى ماكانتش بنت صغيره .. كانت
  ست عندها ٤٠ سنه .. بس جمال أيه وجسم أيه ... كل الرجاله اللى معانا فى الشغل كانوا حايتهبلوا عليها .. وهى مش
  معبره حد فيهم ... وبتجرى ورايا أنا ... 
- الشيطان عايز يجيب رجلك تانى ....
- بالظبط ... قاومتها كتير .. وبقيت أهرب منها .. وبعدين فهمتها إن ده حرام فى دينى .. وماأقدرش أعمله ... قالتلى وأنا
  مش ممكن أخليك تعمل حاجه ضد دينك ... حانبقى مجرد أصدقاء ... 
  بدأنا نتقابل بره الشغل ونخرج سوا ... لقيت فيها الست اللى بيتمناها أى راجل ... عرفت تملى على حياتى ... حبينا
  بعض ... جاب الشيطان رجلى تانى ....
  زعلت قوى .. وتعبت نفسيا .. وقعدت أستغفر ربنا .. وأطلب منه أنه ينجينى ....
  كل يوم الصبح أقول حاأقطع علاقتى بيها ... باليل ألاقى نفسى فى شقتها ....
  طلبت منها نتجوز ... قالتلى إنها جربت الجواز مره ... كان جوزها بيضربها وبيعاملها معامله وحشه جدا .. مش عايزه 
  تسمع سيره الجواز تانى ...
  عشت معاها أحلى ٣ شهور فى عمرى ... لغايه لما أتعرض على شغل فى بلد تانيه بعيده ... وافقت من غير مافكر ...
  ومن غير ماأقولها ... خدت شنطتى وسافرت من غير حتى ماأودعها ... 
- والا كلمه ؟؟؟
- كلمتها فى التليفون ... قلتلها أنا هربت منك ... علشان خوفى من ربنا أكبر من حبى ليكى ...
- عيطت ؟؟؟
- أكيد .. بس مش فى التليفون ... ماكانتش بتحب تظهر ضعفها قدام حد ... مره وهى بتحكيلى عن اللى عمله معاها جوزها ..
  الدموع بانت فى عنيها ... وقفتها قبل ماتنزل على خدودها ...  
  على قد ماكنت فرحان إن ربنا استجاب لى ونجانى من المعصيه ... على قد ماكنت خايف أنى مش حاأقدر أنساها ..
  وحاأرجعلها تانى ...
- بالشكل اللى بتوصفها بيه ده ... أكيد حاترجعلها تانى ....
- ماقدرتش ... سابت الشغل اللى كنا فيه مع بعض .. وغيرت رقم تليفونها .. ولغايه دلوقتى وبعد ٧ سنين مش لاقيها ...
- يعنى ربنا تاب عليك وحياتك أتصلحت !!!
- ده اللى أنا أفتكرته ... لغايه ماوصلت الشغل الجديد ...
- تانى ؟؟؟ معقوله !!!!
- أتعرفت على واحده أصغر منى ب ٢٦ سنه ... لقيت نصى التانى ... أتعرفت لأول مره على معنى الحب الحقيقى ...
  تفاصيل العلاقه حاتخرجنا من موضوعنا ... عايزه قعده تانيه لوحدها .... المهم هنا إنى خرجت من حفره .. وقعت فى
  دحضيره .. زى مابيقولوا ...
  علاقتنا أستمرت ٤ سنين .. أشتغلت فيهم سنتين ... عملت فيهم ١٥ الف يورو ... وبعدين قعدت سنتين من غير شغل ...
  صرفت فيهم كل اللى حوشته .. ورجعت تانى مش لاقى أكل  ... كان فيه مطعم جنب بيتى .. كل يوم باليل يرمى العيش
  البايت فى الزباله ... كنت أستناهم لما يقفلوا .. وأروح أخد العيش من الزباله علشان ماأموتش من الجوع ...
- للدرجه دى !!!
- وأكتر ... ماكانش قدامى حل تانى غير إنى أقطع علاقتى معاها ... على الرغم من أننا كنا بنحب بعض جدا .... طبعا هى
  كانت رافضه .. ومش مقتنعه ... فهمتها أنها لو بتحبنى فعلا لازم تساعدنى أبعد عنها علشان الاقى شغل ... أقتنعت لما
  صاحب البيت طردنى من الشقه .. علشان بطلت أدفع الإيجار .... 
  كنت فاكر أنى أول ماحاأقطع علاقتى بيها حالاقى شغل .... ماحصلش ...
  حسيت إن فيه حاجه غلط ... لسه ربنا غضبان على ... 
  وبعدين أفتكرت إنى كنت مصورها عريانه .. ولينا فيديوهات مع بعض وأحنا بنمارس الجنس موجوده على الكمبيوتر 
  بتاعى ... حسيت أنهم السبب فى إنى مش لاقى شغل ....
  أترددت كتير قوى إنى أمسحهم ... دول أحلى ذكريات فى حياتى للبنت اللى لسه باحبها لغايه دلوقتى ... بس لما لقيت 
  إنى على وشك إنى أشحت فى الشارع ... مسحتهم ...
  تانى يوم علطول .. أتصل بيا واحد صاحبى مصرى .. وعرض على أروح أشتغل فى محل بتاع واحده صاحبته فى 
  جزيره .. وبعتلى ثمن التذكره ...
  سافرت ... وأشتغلت عندهم أو معاهم شهر ونص ... كانت صاحبته بتتضايق لما بنتكلم عربى .. فبطلنا نتكلم عربى قدامها ..
  فى يوم من الأيام بالصدفه .. بادور فى الكمبيوتر .. لقيت الفيديوهات اللى المفروض أنى مسحتها .. موجودين لسه فى سله
  المهملات ... أزاى ده حصل .. مش عارف ... 
  طبعا ماقدرتش أقاوم ... ورجعت أحتفظ بيهم تانى .... بدأت المشاكل تزيد بين صاحبى وصاحبته بسببى ... وكان الحل 
  الوحيد أنى لازم أسيب الشغل ....
- مع أحترامى لحضرتك .. بس أنا حاسس أنك بتفبرك قصه علشان تقنعنى بحاجه .. ماتزعلش منى ...
- معاك حق ... وماقدرش ألومك ... أنا نفسى مستغرب من اللى بيحصلى ... بس أنا ماليش أى مصلحه فى أنى أكذب 
  عليك ... أنا لا أعرفك ولا تعرفنى ... أحنا أتقابلنا صدفه من ساعه ... ويمكن مانتقابلش تانى أبدا .. 
  أقسم لك إن كل اللى باقوله لك حقيقى .. وأن غرضى الوحيد أن تجربتى دى ماتموتش معايا ... عايز الشباب يستفيدوا
  منها .. باحكيهالك علشان تحكيها لغيرك .. وغيرك يحكيها لغيره ... واللى يتعظ يتعظ ....
- فاهم قصدك ...
- أنا عرفت وعاشرت أجمل بنات فى العالم ... سنين طويله ... دلوقتى حاسس أنه كان حلم .. مجرد حلم ...
  كل حاجه فى حياتنا حلم .. ياما أكلنا أحسن أكل .. ولبسنا أحسن لبس .. وأتفسحنا .. وشوفنا .. وعشنا ... 
  فين كل ده ؟؟؟ حاسس بحاجه ؟؟؟
  علشان كده ربنا سبحانه وتعالى قال فى سوره القصص : وماأوتيتم من شئ فمتاع الحياة الدنيا وزينتها  وماعند الله 
  خير وأبقى أفلا تعقلون ... وقال فى سوره الشورى : فما أوتيتم من شئ فمتاع الحياة الدنيا وماعند الله خير وأبقى
  للذين أمنوا وعلى ربهم يتوكلون ...

- برضه مع إحترامى لحضرتك .. أنا أعرف ناس كتير غرقانين فى المعصيه .. وعلى الرغم من كده معاهم فلوس ..

  وعايشين كويس ...

- علشان مافيش قاعده ثابته فى الدنيا .. مش كل اللى عايشين مستمتعين فى الدنيا .. ربنا راضى عنهم ... ولا كل اللى

  تعبانين فى الدنيا ومش لاقين ياكلوا .. ربنا غضبان عليهم ...

  وبعدين ربنا ممكن يبتليك فى فلوسك .. وممكن يبتليك فى صحتك .. أو فى زوجتك .. أو أولادك ....  

  ده غير إن الإبتلاء فى الدنيا مش عقاب .. ساعات كتيره ربنا بيبتليك علشان يفوقك .. ويرجعك للطريق المستقيم ...

- صحيح ... 

  ياترى فيه باقى للقصه ؟؟؟

- باقى القصه .. إنى من ساعتها كل مالاقى شغل .. يكون مرتبى ٤٥٠ يورو ... مش بيزيد عن كده ...

  عارف ليه ؟؟؟

- ليه ؟؟

- لأنى لسه محتفظ بالصور والفيديوهات بتاعه البنت الأخيره دى .. على الكمبيوتر بتاعى ... مش قادر أمسحهم .. 

  لأنها الحب الحقيقى فى حياتى .. من ساعه ماسبتها من ٥ سنين .. ماعرفتش غيرها .. ومالمستش أى واحده ...

  عايش على ذكراها ... ومش عايز أمسح ذكرياتى معاها ...

  أنا متأكد إنى لو مسحتهم .. ربنا حايوسع رزقى .. وحالاقى شغل أحسن ...

  أكيد حاأمسحهم .. مش عايز يكونوا سبب فى دخولى النار لما أموت .. 

  مافيش أى حاجه فى الدنيا كلها .. مهما كانت .. تستاهل أنك تدخل النار علشانها .... صدقنى ...

- معلش .. برضه مع أحترامى لكل اللى حضرتك قولته .. مش من العدل أنك تعيش حياتك وتستمتع بيها ... وتعرف 

  بنات الدنيا والأخره .. وبعدين تيجى تقولى أوعى تجرب لحسن حاتدخل النار ... أو فلوسك كلها حاتروح وحاتشحت ...

  دى أنانيه ....
  من حقى أنا كمان أجرب ... وأتوب ... ربنا غفور رحيم ...

  صح ؟؟؟؟