(43) خِداع
- مين دى !!!
- البنت اللى كنت باكلمها بقالى ٩ أيام ...
- ياراجل ... ماأنا قولتلك ١٠٠ مره فكك منها ... دى مجنونة ...
- لأ مش مجنونه ... هى ممكن تكون مضطربه نفسيا شويه ... بس مش مجنونة ...
- دى مريضة نفسيا ... واحده عامله بروفايل وهمى على الفيس بوك ... كاتبه فيه أسم مستعار ... علشان تظهر فيه
الجانب المظلم من حياتها ... وتوهم الناس بشخصيه غير شخصيتها ... وتتعرف على الرجاله علشان تتلاعب
بمشاعرهم وعواطفهم ... وتستمتع بتعذيبهم ... دى مش إنسانه مريضه !!!!
واحده متخيله إن واحده قريبتها سحاقيه عايشه معاها ... وإن قريبتها دى كل يوم بتفترسها ... مره تقولك مش
باقدر أقاومها ... ومره تقولك تعبت خلاص منها مش عايزاها تقربلى ... ومره تقولك أصل ده حرام بيغضب
ربنا ... وتقعد تحكيلك التفاصيل ... وتلاقيها بتعمل الكلام ده مع القطه بتاعتها .....
واحده مصوره للناس نفسها على انها البنت اللى كل الرجاله حايموتوا عليها وهى مش معبره حد ... البنت اللى
بعشر رجاله اللى تفوت فى الحديد ... البنت المرحه اللى بتضحك طوب الأرض ... البنت المستبيعه اللى ماحدش
مالى عينها ... مشكلتها الوحيده إنها مش بتطير زى سوبرمان ....
- أنت بتبالغ قوى ... ومتحامل عليها زياده عن اللزوم ...
- متحامل أيه ياراجل ... أنت ازاى كنت مستحمل كذبها عليك كل الوقت ده ... أزاى رضيت إنها تلعب بيك بالشكل
ده ... ليه ماعملتلهاش أنت بلوك من أول يوم ...
- أنت ليه بتفترض إن كل كلامها كذب ... أنا مصدقها ... ممكن تكون بتبالغ شويه ... بس مش بتكذب ... ممكن تكون
اتعرضت لضغوط ... ممكن الحياه كانت قاسيه عليها ... وبتنفس عن نفسها بالشكل ده .. بدل ماتتجنن والا تعمل
فى نفسها حاجه .... ده إحساسى ...
- إحساس مين ياأبوإحساس .... أنت بتضحك على نفسك !!!
المصيبه إنك مش محتاجلها ... المصيبه إن حواليك بنات بالهبل ... وطول النهار بتكلم بنات على النت وفى
التليفون ... أيه اللى شدك فى دى وخلاك تسيبها تلعب فى عقلك وتقعدك على حجرها وتهشتكك كمان !!!
- الفضول ... كنت عايز أعرف هى مين ....
كمان حسيت إنها محتاجانى ... محتاجه لحد يسمعها ... يفهمها ... يحس بيها ...
- مش عايزه حد يسمعها ... هى عايزه حد ساذج وأهبل يصدقها ... يعجب بالكلام اللى بتكتبه ويقولها إيه الحلاوه
دى ... يولع ويشيط وصوابعه تترعش على الكى بورد لما تكلمه فى الجنس ...
إنما أنت بقى كنت حمار ... قعدت تحاصرها علشان تعرف هى مين ... بينتلها إنك مش مصدق ولا كلمه من
كلامها ... وشاكك فيها ... ماعجبكش اللى بتكتبه ... كنت صريح معاها ... كنت بتحلل لها كل كلمه بتقولها ..
كنت بتخوفها منك .. كنت بتكشفها وبتعريها قدام نفسها .. كلامها فى الجنس كان عادى بالنسبه لك ... كنت
بارد مش بتتأثر ولا بتريل ولا بتتجاوب معاها ....
عايز أيه تانى !!!!
زهقت منك ... راحت تشوف حد تانى يصدقها ويعاكسها ويجاريها ويلح عليها ...
- لعلمك دى بنت مثقفه جدا .. ومتدينه .. وذكيه .... وأنا كنت مستمتع جدا بالكلام معاها ...
أنت بس اللى مش عايز تشوف غير عيوبها ....
ولعلمك .. حاترجع تانى ...
- لأ عمرها ماحاترجعلك تانى ... إنساها نهائى ... أنت بالنسبه لها زى الشيكولاته ... طعمها حلو بس بتتخن ...
ممكن تيجى على نفسك وتقرر انك مش حاتدوقها تانى .. حاتهف عليك كل شويه .. بس مش صعب انك تقاومها ...
وبعدين أنت ياإبنى مابتحرمش ... بتتجرح كل شويه مابتتوبش !!!
ياما فتحت قلبك وصدرك لناس ... رموا هموهم عليك ... قعدت ليالى تسمع مشاكلهم ... وتمسح دمعتهم ...
وتنصحهم .. وتشجعهم .. وترفع روحهم المعنويه ... وترجعلهم ثقتهم فى نفسهم ... وتقويهم على الدنيا ....
وفى الأخر ... هما فين دلوقتى ... سابوك ومشيوا ... إدوك ظهرهم لما بقوا مش محتاجينك ....
بطل بقى تبقى سجاده لكل واحد يمسح فيك رجليه ويمشى ... فوق بقى وأتعلم تتعامل صح مع الناس ...
ماتديش لحد قيمه أكتر من اللى يستحقها ... وماترخصش نفسك ....
وطلع البنت دى من دماغك خالص ... ولو كلمتك تانى إعملها أنت بلوك ....
انا مش فاهم أنت زعلان عليها ليه ... ماهياش ورده ناديه مفتحه يعنى ....
- زعلان لإنها كانت بتصحينى كل يوم أصلى الفجر ...
- إشترى ديك ياأخى ....
This comment has been removed by the author.
ReplyDeleteThis comment has been removed by the author.
ReplyDelete