(2) وَضَاعَةً

- وبعدين معاك يعنى ياحاج محمود !!!

- فيه ايه يامعلم  جرجس !!! 

- مالك أنت ومال الواد ليفى ؟

- ازاى مالى وماله ...  خد المحل بتاع الحاج ابراهيم بالعافيه وفرش فيه ورمى الحاج ابراهيم فى الشارع ...

- طب وأيه يعنى !!
- أيه يعنى أزاى .... ده ظلم وإفترا ... ومايسكتش عليه ... 
- يعنى عايز تتحدانى ياحاج محمود !!!!
- وأنت دخلك أيه أنت يامعلم ؟؟؟
- الواد ليفى ده تحت حمايتى ... واللى حايتعرض له يبقى يقول على نفسه السلام ...

- والحاج ابراهيم يامعلم جرجس !!!

- حانجيب له فرشه يقعد عليها ... والا تزعل

- يعنى بعد ماكان صاحب ملك ... يقعد على ناصيه الشارع بفرشه !! 

  وليه الواد ليفى مايقعدتش على فرشه !!!  والا تديله حته من محلك يقعد فيها  !!!

- انا ماحبش الكلام الكتير , اللى قلته هو اللى حايمشى , واللى حايقرب من الواد ليفى حااقطع رقبته ..
  وبعدين لم عيالك .. خليهم يبطلوا يتحرشوا بيه ...

- عيالى دمهم حامى , ومايحبوش الظلم ...

- يبقى انت اللى جنيت على عيالك ياحاج محمود ...

- يامعلم جرجس أنا ماقدرش أقولهم شوفوا الظلم واقفوا إتفرجوا ...

- يبقى تقصص ريشهم ياحاج ...

- اقصص ريشهم !!!!!

- ايوه ... تقصص ريشهم ....

- يعنى ايه يامعلم !!!

- يعنى الفراخ اللى مربياها مراتك والبيض بتاعهم ... تبيعهم للواد ليفى وتشترى فراخ وبيض من عنده ...

- دى الفراخ بتاعته عيانه ... والبيض بتاعه ضارب .. وكل بضاعته تجيب المرض ...

- عليك نور ...

- يعنى اموت عيالى !!!

- مانت عيالك كتير ياحاج محمود ... لو مات منهم اثنين والا ثلاثه .. مش مشكله ...

- لا حول والا قوه الا بالله ...

- ومن بكره مافيش مدارس ومافيش تعليم .... خليهم يقعدوا معاك فى المحل يساعدوك ...

- لكن يامعلم ...

- ومافيش دكاتره ومستشفيات والكلام الفاضى ده .. اللى يشتكى من حاجه تغلى له شويه كمون .. اه

- لكن يامعلم ...

- وكل شويه تقرفهم فى عيشتهم ... مره تقفل محبس الميه ... ومره تنزل سكينه الكهرباء .. ومره تقطع سلك التليفون ...

- لكن يامعلم ...

- لازم يعيشوا فى معاناه ... لازم تكسرهم ... وماتخليهومش يفكروا لا فى الواد ليفى ... والا فى الحاج ابراهيم ... والا فى
  اى حاجه فى الدنيا غير فى مشاكلهم وبس ..
- لكن يامعلم ....
- هما ٣ حاجات اللى حايضمنوا لى ان الواد ليفى حايعيش فى أمان ... الفقر والجهل والمرض ...

- يامعلم جرجس أنت مش شايف غير ولادى ؟؟  ماهى المنطقه كلها مستحلفه للواد ليفى ...

- مالكش دعوه أنت ... انا اعرف أتصرف معاهم .... أنت ماشوفتش انا عملت ايه فى صاحبك اللى على اخر الشارع ...
  اللى كان عاملى فيها دكر !!! أدينى علقته من رجليه ودبحته يوم العيد الصبح مع الخرفان ....
  وكلكم كنتم شايفين وماحدش فيكم فتح بقه ..
  تحب تبقى زيه والا تخليك عاقل !!!!

  وبعدين سيبك من ده كله .. انت لو ضمنت لى ان الواد ليفى حايعيش فى امان انا حانغنغك ... حااخليك تعيش زى هارون
  الرشيد ... وحااحميك وماحدش حايقدر يقرب منك ...

- ازاى بس اضر ولادى بإيدى يامعلم !!!

- أنت فاكر أنك كده بتضرهم ... أنت كده بتدور على مصلحتهم ... أنا قلبى عليكم .. مش عايزكم تتبهدلوا...
- الأمر لله يامعلم ...

- براوه عليك ... واسمع ... شويه النحاس القديم اللى عندك فى البيت .. اللى أنتم شايلينهم انتيكه دول ... بدل ماهما مركونين 

  كده ... انا عندى لهم بيعه حلوه .. حاتطلع منها بمبلغ محترم ...

- أنت بتقول أيه يامعلم ... مايصحش كده .... دى حاجه أحنا وارثينها أب عن جد , ثروه عمرنا , ماضينا وحاضرنا ومستقبلنا
  .... وبعدين دى حاجه مش ملكى ... دى ملك العيله كلها.....

- ياراجل ..... كبر مخك ..