خرجت من عملى وانا فى غايه الضيق .... كنت ثائره وغاضبه وحزينه .... ولكنى لم أكن ادرى ماذا افعل .....
لم أكن اتصور اننى سأقف هذا الموقف يوما من الأيام ..... العيون الباكيه التى كانت تنظر الى مستجديه الشفقه والرحمه تلاحقنى ..... اصوات السخط والاستنكار واللعنات والسباب تطاردنى .....
إريد أن أغلق الابواب على نفسى وأبكى ...أبكى واطلب من الله الصفح والغفران .....
لن استطيع أن أطهو شيئا اليوم .... سوف أشترى أى شئ جاهز من أى مطعم .... فقط من أجل زوجى ... ليست بى رغبه للطعام ولا لأى شئ ....
على ناصيه شارعى لمحت رجلا عجوزا , جالسا على الأرض , واضعا رأسه بين كفيه , وأمامه كوب قديم فيه بضع بنسات ....
لم أفكر ولو لوهله قبل أن اعطيه لفه الطعام التى اشتريتها لزوجى .... لعل الله يتقبلها ويغفر لى مافعلت اليوم .....
سأطهو اليوم مكرونه ... ومعها جبنه وزيتون .... فلنأكل يوما مثل الفقراء .... بل ان الفقراء أحيانا لا يأكلون ...
قبل الرابعه بقليل حضر زوجى .... كان سعيدا للغايه .... حملنى وأخذ يدور حول نفسه وهو يقول :
- باركيلى .... باركيلى ..... اشتروا الإختراع بتاعى ...
- مبروك .... الف مبروك ...
- مالك بتقوليها من غير نفس كده ليه ؟
- أبدا والله ... أنا فرحانه جدا علشانك .... بس انا متضايقه شويه ...
- ليه !! إيه اللى حصل !! حد ضايقك ؟؟
- لا ابدا ... من الشغل وكده ...
- أنا نفسى مفتوحه .. وجعان بصراحه ... وممكن أكل خروف بحاله لوحدى ...
- مكرونه ...
- خروف ..
- مكرونه ... وجبنه وزيتون ....
- طب ليه كده !!!
- معلش ياحبيبى ... ماقدرتش اطبخ ...
- طب نطلب أكل ...
- ياحبيبى احنا كل يوم بناكل أحسن أكل .... فيها ايه لو يوم أكلنا شويه مكرونه وحته جبنه .... مش حانموت يعنى ...
- خلاص خلاص والا تزعلى .... بس المكرونه لوحدها , والجبنه لوحدها .... اوعى تكونى ضربتيهم مع بعض فى الخلاط ...
لم يكن أمامى سوى الجلوس الى المائده مع زوجى حتى لا افسد عليه فرحته وسعادته ... تحاملت على نفسى وانا أدفع الطعام
دفعا إلى جوفى .....
- إنتى عارفه ... أنا مش هاممنى الفلوس اللى كسبتها النهارده .... اللى هاممنى انى باقدم خدمات للأنسانيه ...
- انت متأكد انك بتقدم خدمات للإنسانيه !!!!! مش يمكن العكس !!!!
- العكس !!!! إنتى عارفه الإختراع بتاعى ده قد ايه حايوفر وقت ومجهود وفلوس وعماله و......
لم اتمالك نفسى ... وانفجرت فى البكاء ....
- فيه ايه مالك ياحبيبتى ... ايه اللى حصل ....انا قلت حاجه غلط !!!!
قام يحتضننى .. ويجفف دموعى اللى لا تتوقف ...... لا أعرف ماذا اقول له ...... حاولت أن اتماسك ....
- النهارده الشركه استغنت عن ٨٠ عامل .... طردتهم ....قفلت بيوتهم .... وأنا اللى كان لازم ابلغهم .... لو شفت منظرهم ...
لو شفت الدموع فى عنيهم .... لو شفتهم وهما بيترجونى بلاش اطردهم ..... لو سمعتهم وهما بيدعوا على ......
- طب إهدى بس .... خدى اشربى شويه ميه ....
- مش قادره اهدا .... أنا باشوف كوابيس وأنا صاحيه ..... مش حااقدر أنام .... صورتهم بتطاردنى ......
- حبيبتى إنتى مالكيش ذنب .... مش إنتى اللى طردتيهم .... الشركه هى اللى استغنت عنهم .....
- والشركه استغنت عنهم ليه !!!! عارف ليه !!!! علشان جابوا مكانهم إختراعات تعمل شغلهم .....
إختراعاتكم بتخدم اصحاب رؤس الأموال ....... ولكن بتقفل بيوت الغلابه .... بتزود البطاله ..... بتجمد السوق .... بتقلل
السيوله ..... بتدمر المستقبل شويه شويه من غير ماحد يحس .....
اخترعتم ماكينات لتذاكر الاتوبيس ، وقعدتم الكسماريه فى بيوتهم ......... اخترعتم ألات تبنى ، وقعدتم البنائين فى بيوتهم ...
اخترعتم ماكينات صرف ألى فى البنوك ، وقعدتم الصرافين فى بيوتهم ...... اخترعتم ماكينات تعمل اكل جاهز ، وقعدتم
الطباخين فى بيوتهم ...... اخترعتم ألات تصنع كل حاجه وقعدتم ألاف العمال فى بيوتهم ..... ده لو لسه عندهم بيوت ....
الطباخين فى بيوتهم ...... اخترعتم ألات تصنع كل حاجه وقعدتم ألاف العمال فى بيوتهم ..... ده لو لسه عندهم بيوت ....
السرقات زادت .... الخطف والاغتصاب زاد .... الجريمه إنتشرت ..... نسبه الانتحار زادت .... نسبه الإكتئاب زادت .....
البيئه بقت ملوثه ...... الأكل ماعدتش له طعم ..... أمراض جديده عمرنا ماسمعنا عنها أنتشرت ....
الفقير بيزداد فقر .... والغنى بيزاد غنى ......
- استنى بس ياحبيبتى .... أنا مش معترض على اللى انتى بتقوليه ده كله ..... بس انتى بتبصى للموضوع من زاويه واحده
بس ..... بتعددى السلبيات ، ومش شايفه الإيجابيات ....
الدنيا لازم تتقدم .... لازم كل حاجه تتطور .... العلم والتكنولوجيا هما السبب فى سعاده ناس كتيره ... الحياه بقت اسهل ...
الطب اتقدم .... وسائل الإتصالات إتقدمت .... وسائل التعليم وجمع المعلومات اتقدمت ....
إنتى متخيله العالم من غير التكنولوجيا كان حايبقى عامل ازاى !!!!!
- ايوه طبعا متخيله .... ناس بتتمشى على البحر .... ناس بتقرا فى كتب .... ناس قاعدين فى البلكونات بيكلموا جيرانهم ...
ناس بتزور بعض ..... ناس بتكتب جوابات لبعض ..... أطفال بتلعب كوره فى الشارع ..... ناس بتشتغل شغله واحده والفلوس
بتكفيهم . وبيرجعوا بيتهم الظهر يتغذوا مع ولادهم وياخدوهم يفسحوهم العصر ....
هوا نظيف ، واكل صحى ، وكوارث طبيعيه أقل .....
طب تقدر تقولى ... لو الكمبيوترات اللى فى العالم كلها اتعطلت .... وماتقوليش انه مش ممكن يحصل ... لانه حايحصل فى
يوم من الايام ..... حياه الناس حاتمشى ازاى ؟؟؟؟
حسابات البنوك كلها حاتضيع .... السجلات اللى فى كل المصالح حاتتمسح .... المصانع كلها حاتقف .... اشارات المرور
حاتتعطل ..... اللى ساكنين فى ناطحات السحاب عمرهم ماحايطلعوا بيوتهم .......
- يعنى تقدرى تعيشى من غير موبايل ولاب توب ... وتطلعى السلم على رجليكى ... وتروحى الشغل بحنطور !!!
- ابقى كذابه لو قلت ايوه اقدر ..... انا مش معترضه على العلم والتقدم والتكنولوجيا ..... انا معترضه على الفجوه اللى
بتزيد بين الفقراء والاغنياء ..... انا معترضه على البطاله ... على تلوث البيئه .... على تدميرنا للارض اللى عايشين عليها ..
- وتفتكرى ايه الحل ؟؟
- مش عارفه .... بس لازم يكون فيه حل ....
على الاقل نساعد بعض .... الغنى يساعد الفقير .... مايبقاش فيه ناس مكدسه فلوسها فى البنوك ، وبتشترى حاجات مش
محتاجاها ..... وناس تانيه بتاكل من صناديق الزباله ...
- هو ده المفروض .... كلنا لازم نساعد بعض ......
- يبقى المبلغ اللى انت بعت بيه اختراعك كله .... نوزعه على ال ٨٠ عامل اللى اتطردوا النهارده .....
No comments:
Post a Comment