- ماما ... أمتى حاييجى بابا نويل ..
- باليل ياحبيبتى ....
- الساعه كام يعنى ...
- الساعه ١٢ .....
- ياه ... الساعه ١٢ ..... هو ليه بيتأخر كده ....
- ماما ..... أنا مش حاأنام غير لما بابا نويل ييجى .... أنا عايزه أشوفه مره ....
- أنا شوفته ....
- لأ ماشوفتيهوش .... ماشافتوش ياماما ... ياكذابه ...
- أنا مش كدابه .... وبابا نويل حايجيبلى النهارده العروسه .... ومش حاتلعبى معانا ....
- ماما .... هو ليه بابا نويل بيجيب لنا هدايا ....
- علشان هو بيحب الأطفال ....
- هو ماعندوش ولاد ....
- عنده .... بس مامتهم مش بتخليه يشوفهم ....
- ليه ....
- أصل بابا نويل ومراته زعلوا من بعض .... قامت مراته خدت الولاد وراحت سكنت فى حته تانيه .... وقالت لبابا نويل
مش عايزاك تقرب من الولاد .... ولو رحت لهم المدرسه حاابلغ البوليس .... بابا نويل زعل خالص ومابقاش عارف يعمل
أيه .... وبعدين قعد يفكر وقرر انه يروح باليل لأولاده وهما نايمين يبوسهم ويحطلهم هدايا على المخده ويمشى من غير
ماحد يشوفه .....
وبعدين ولاده كبروا .... وبقوا يروحوا يزوره ... وماعدتش مضطر إنه يروحلهم باليل وهما نايمين ... ولقى أن ولاده
بالرغم من أنهم ماكانوش بيشوفوه ... الا إنهم لسه بيحبوه .... فعلشان يشكر ربنا قرر أنه كل سنه يجمع هدايا ويروح
لكل الأطفال باليل وهما نايمين ويوزعها عليهم .... وخصوصا الأطفال الفقرا اللى ماعندهومش حد يجيب لهم هدايا ...
- إحنا كمان فقرا ؟
- لأ احنا مش فقرا ياحبيبتى .....
- فيه واحده ست فقيره بتقعد جنب سور المدرسه بتاعتى ... مره كنت باكل فى السندوتش بتاعى .. لقيتها بتبصلى ....
كنت عايزه أروح أديها حته ... بس خوفت منها ....
- خوفتى منها ليه ياحبيبتى ؟
- أصل شكلها كده .. يخوف .... هدومها مش نظيفه .... وشعرها منكوش .... ومش بتغسل وشها ... والا سنانها ...
- أنا باغسل سنانى بالفرشه .... مش كده ياماما ؟
- أيوه ياروحى ... إنتى شطوره ....
- ماما .... هو ليه فيه ناس فقرا ؟
- ربنا خلقنا كده .... ناس أغنيا .. وناس فقرا ...
- وليه ماخلناش كلنا أغنيا .... هو مش عنده فلوس تكفينا كلنا ؟
- بصى ياستى .... لو بابا اشترى لكل واحده فيكم عروسه .... أيه اللى حايحصل !!! كل واحده فيكم حاتاخدعروستها وتروح
تقعد فى حته لوحدها تلعب بيها ... صح !
لكن لو هو جاب لكم أنتم الاثنين عروسه واحده .... أيه اللى حايحصل !!! حاتقعدوا تلعبوا بيها مع بعض ... أو إنتى شويه
وأختك شويه .... حاتصاحبوا بعض , وحاتتكلموا مع بعض , وحاتحبوا بعض , وحاتلعبوا مع بعض ....
ده لو أنتم بنات حلوين .... لو أنتم بنات وحشين .. حاتتخانوا طول الوقت بسبب العروسه .... وحاتخطفوها من بعض ...
وحاتخبوها من بعض .... وحاتضربوا بعض .....
ولو انتم وحشين قوى ... واحده فيكم حاتقطعها أو تكسرها أو ترميها من الشباك ... علشان مش طايقه تشوف أختها سعيده
وبتلعب ومبسوطه ....
علشان كده ربنا خلانا فقرا وأغنيا علشان يشوف أحنا حلوين والا وحشين ... حانحب بعض ونساعد بعض ونعيش مع
بعض ..... والا حانكره بعض ونغير من بعض ونحارب بعض .....
- ولقى إيه ؟
- هو مين ؟
- ربنا .... لقانا حلوين والا وحشين ؟
- فيه ناس كتيره حلوين ... بيساعدوا الفقرا وبيدوهم أكل وبطاطين تدفيهم فى الشتا .... وفى ناس وحشين بياخدوا كل حاجه
لنفسهم .. ومش بيدوا حاجه لحد ...
- واحنا حلوين والا وحشين ؟
- إنتى شايفه أيه ؟
- أنا لما أشوف الست الفقيره حاأروح أديها السندوتش بتاعى ... أنا مش بابقى جعانه ....
- لا ياحبيبتى ... إنتى تاكلى السندوتش بتاعك .... وأنا كل يوم حاأديكى علبه صغيره وإنتى رايحه المدرسه فيها أكل تديها
للست الغلبانه .... بس من جوه السور ... ماتخرجيش بره المدرسه لوحدك ....
- أنا كمان عايزه أديها علبه ....
- لأ أنا اللى حاأديها ....
- يالا يالا علشان تناموا ....
- ماما ..... أنا حاأجيب المخده بتاعتى وأنام هنا جنب الشجره .... عايزه أشوف بابا نويل لما ييجى ....
- وأنا كمان ....
- حاتناموا على الأرض !!!
- أه ....
- أه ....
- ماما .... أنا مش باحب مرات بابا نويل .... هى ست وحشه .... صح !!
- اللى تحرم أب من أولاده , وتحرم أولاد من أبوهم , أكيد تبقى ست وحشه ...
- أنا بحب بابا نويل ....
- وأنا كمان بحب بابا نويل ....
- أنا مش حاأغمض عنيا علشان ماأنامش .... وحاأستنى بابا نويل لما ييجى ....
- وأنا كمان مش حاأغمض عنيا ......
No comments:
Post a Comment