(15) غَيرة

- إيه رأيك لو نتمشى لحد البيت !!

- الساعه ثلاثه الفجر يامجنونه ....  يخطفونا ...

- مين دول اللى يخطفونا .... يالا يالا بلاش كلام فاضى ....

- أنا خايفه عليكى إنتى .... أنا ماحدش بيعبرنى ... الرجاله بيهربوا منى ....

- تانى !!!  يابنتى إنتى مش وحشه والله .... مليون مره قلتلك الكلام ده ..... إنتى اللى معقده نفسك من غير سبب  ... وبعدين
  مقاييس الجمال بتختلف من راجل للتانى ... فيه راجل بيحب البنت الطويله , وراجل بيحب القصيره .... راجل بيحب التخينه
  وراجل بيحب المسلوعه ..... راجل بيحب الشقرا , وراجل بيحب السمرا ..... وهكذا ....

- مقاييس الجمال مش بتختلف ... المقاييس ثابته ... والدليل عارضات الازياء ... كلهم بمقياس واحد ... مافيش راجل يقدر

  يقول على واحده فيهم وحشه ..... 

  اللى بيحصل إن البنت الجميله بتدور على راجل وسيم وغنى .... والراجل الوسيم الغنى بيدور على بنت جميله .... انما الناس 

  العاديه بيحاولوا يختاروا أحسن الوحشين .....

- الإنسان ... سواء راجل او ست , اللى بيبص للشكل وللجمال الخارجى , انسان تافه مايستحقش المعاشره ....

- لا مش تافه .... عشق الجمال فى أى شئ مش تفاهه ....

- أنا ماقولتش ان عشق الجمال تفاهه .... انا باقول ان الراجل مثلا اللى يقرر انه يرتبط طول حياته بواحده لمجرد انها جميله 

  بيرتكب اكبر غلطه فى حياته ..... لان أى بنت مهما كانت جميله , بعد عشر سنين , شكلها حايتغير , وجسمها حايتغير ....

  حايفضل فى النازل ... يوم من الايام حايلاقى ان الحاجه اللى ربطته بيها ماعدتش موجوده ... ساعتها حايعمل ايه !!!

  حايطلقها , والا حايعيش فى عذاب !!!!!

  إنما الجمال الداخلى ... العقل , الروح , الشخصيه .... دى حاجات مع الإيام بتزيد مش بتنقص .....

- إنتى مرعوبه من جمالك ليه ؟؟

- علشان أحيانا الجمال بيكون نقمه مش نعمه ... والعكس صحيح ....

  أنا كل شئ فى حياتى مزيف .... كله متعلق بجمالى .... ولو فى يوم فقدت الجمال ده ... كل شئ فى حياتى حاينهار .....

  كل اللى بيعرفونى .. بيعرفونى علشان انا جميله ..... فى الشغل قبلونى فى الوظيفه علشان أنا جميله ..... الرجاله اللى بتتقدملى 

  بيتقدمولى علشان أنا جميله ..... طب بعد عشر سنين او عشرين سنه حتى .... حياتى حاتبقى شكلها ايه !!!!!

  كل ده حايختفى .... 

- وبتقولى على أنا اللى معقده ..... داإنتى أم العقد اللى فى الدنيا كلها ..... طب تخيلى انك كنتى شبهى كده .....  أصحابك معدودين

  على الصوابع .... كل ماتتقدمى لوظيفه يرفضوكى .....  مافيش عريس بيتقدملك وقربتى تعنسى .... كنتى عملتى إيه !!!!

- كنت حاابقى سعيده ... علشان اصحابى اصحاب حقيقيين .. مصاحبنى علشان شخضيتى بتعجبهم .... باشتغل فى وظيفه أنا
  استحقها , مش اتقبلت علشان مديرى طمعان فيا , وكل شويه حاينطلى ويحاول انه يلمسنى او يحك فيا ..... الانسان اللى

  حايرتبط بيا . حايكون بيحبنى فعلا ... وفيه حاجه مشتركه بتجمعنا سوا , لقيناها فى بعض , مش علاقه مزيفه .....

- أيه ده يابنتى .... إنتى ماعندكيش ثقه فى حد خالص ... إنتى غلطانه ... إنتى كده بتعذبى نفسك ....المفروض تستمتعى بنعمه

  الجمال اللى ربنا وهبهالك .... وبعدين إنتى ممكن تعرفى مين اللى بيعرفك لمجرد إنك جميله , ومين اللى بتعجبه شخصيتك ..

- لما تكونى جميله , أى حاجه حاتقوليها كل اللى حواليكى حايوافقوا عليها .... لو قولتى نكته عبيطه كلهم حايضحكوا .... لو

  كتبتى اى هبل على الفيس بوك حاتلاقى 5000 لايك ......

  ماحدش حايقولك أنا معجب بيكى علشان انتى جميله .... حاتسمعى دايما كذب ... قد أيه انتى رقيقه .. قدأيه انتى ذكيه ... قد

  ايه انتى محترمه .... حتى لما حاتعجزى وتبقى كركوبه برضه حاافضل احبك .....

- طب انتى عايزه إيه ؟

- نفسى واحد يحبنى من غير مايشوفنى او يشوف صورتى .... نكتب لبعض او نكلم بعض فى التليفون من غير ماأعرف هو

  مين والا هو يعرف أنا مين ..... يكلمنى من غير مايخاف ليخسرنى .... يكلمنى وهو كل اللى يهمه شخصيتى وطريقه تفكيرى ..

  مايهمهوش لو طلعت وحشه .... مايفكرش ....

- ستوب ستوب ..... إنتى كده خرفتى ..... خدى نفس كده وإهدى ... وأنا حااجيبلك حقك ....

- ياشيخه روحى كده ...

- أنا مش قلتلك بلاش تتفرجى على المسلسلات التركى .... هو فيه حد أول ماحايتعرف عليكى حايقولك أنا واطى وحاأصبحك كل
  يوم بعلقه وحاأمسيكى بعلقه !!!! أى اثنين لما بيتعرفوا على بعض كل واحد بيركب قناع الأدب والأخلاق والشهامه والكرم ....
  أنا طبعا مؤمن بحريه المرأه , وبأنها لازم تشارك فى المجتمع بنفس حقوق الراجل ..... أنا مؤمنه   بإن الراجل لازم هو اللى
  كلمته تمشى فى البيت وإن الزوجه لازم تطيعه ....... تعالى بقى بعد الجواز .... 

- خلاص ... خلاص .... الظاهر احنا الاثنين محتاجين دكتور نفسى ....

- احنا محتاجين نبدل جسمنا مع بعض ..... إنتى تجربى تبقى وحشه وماحدش يعبرك .... وانا أجرب ابقى جميله كده ... ومنين 

  مااروح , الرجاله يبصولى ويقعوا من طولهم .... وانا أدوس عليهم بقى .. وأفعصهم كده ...

- موافقه ....

- واقوم من النوم الصبح البس اى حاجه وأخرج .... لا اقعد ساعه افرد فى شعرى ... والا ساعه أدهن فى وشى ... والا ساعه

  أحشر نفسى فى الهدوم الضيقه ......

- وأنا حاامشى فى الشارع ماحدش حايعاكسنى .... حاأركب الأتوبيس ماحدش حايتحك فيا ..... حااروح الشغل ماحدش حايقعد

  يستظرف معايا ويقرفنى ...... 

- نعمل عقد ب3 سنين ....

- اشمعنى !!!

- لأنك مش حاتستحملى اسبوع وحاترجعى فى كلامك .....

- عارفه .... أنا أكتشفت حاجه .... إن شخصيه الانسان بتترسم على ملامح وشه .... وأى تغيير فى شخصيته بيتبعه تغيير فى

  ملامحه ..... عندك الاطفال لما بيتولدوا .. ملامحهم كلهم بتبقى بريئه .... على حسب اللى بنحشره جواهم ... ملامحهم بتتغير ..

  يعنى المتعلم إبن الناس , علطول بيبان عليه ... والصايع مدمن المخدرات , علطول بيبان عليه .... صح !!!

  وبناء عليه طبيعه أى إنسان .... جاد , مرح , ملتزم , فوضوى , متزمت , حنون , قاسى , لعبى .... كل ده بيبقى مرسوم على 

  ملامح وشه .... بس طبعا مش كل واحد عنده القدره انه يقرا ملامح الوش .....

- إنتى عايزه توصلى لإيه ....

- كان معايا فى الكليه واحد شكله بيديكى الإنطباع بإنه إنسان جاد ومش بتاع علاقات مع بنات وكلام من ده .... فيه بنات كتير

  كانوا نفسهم يصاحبوه , بس كانوا خايفين يروحوا يكلموه ..... المهم أنا وهو إتعرفنا بعد كده وبقينا أصدقاء جدا .... فى يوم

  قلتله الحكايه دى .... تصورى كان حايتجنن .... ماكانش مصدق أن شكله مخلى البنات خايفه تيجى تكلمه ....

- وبعدين ....

- اللى عايزه أقوله ... إن كل واحد فينا ملامحه وتعبيرات وشه , حتى طريقه مشيه , بتدى إنطباع معين للى قدامه .... فيه بنت

  بتدى للرجاله بوشها إنطباع بإنها لعبيه ومستهتره وكل يوم مع واحد .... وممكن ماتكونش هى كده خالص ..... وواحد بيدى

  للبنات بوشه إنطباع بإنه إنسان جاد وملتزم ومش بتاع علاقات وحاجات من دى , زى صاحبنا إياه , وهو فى الحقيقه مش 

  كده خالص ..... مالاحظتيش والا مره حاجه كده ؟؟؟؟

- ساعات أه ... بس مش دايما ....

- إنتى ممكن تكونى واقعه فى الفخ ده من غير ماتعرفى .... يعنى الرجاله مش بيهربوا منك علشان انتى وحشه .. لا .. علشان

  إنتى مكلكعه ..... علشان خايفين يقربوا منك لتمسحى بيهم الأرض ... 

- أنا ؟؟؟؟؟

- طب إسألى حد من زمايلك الرجاله ..... إيه الانطباع اللى خدته عنى أول ماشوفتنى وشوفى حايقولك أيه ......

- فيه عربيه ماشيه ورانا .... 

- عربيه إيه ؟؟؟

- ماتبصيش وراكى .... فيه عربيه ماشيه ورانا بالراحه خالص ....

- أول مانوصل الشارع اللى جاى ده يمين .... حاندخل فيه وجرى ... ماشى 

- ماشى ..

- إجرى .. إجرى ..