- حاتعمل شاى !!!
- على النار ....
- أوعى تنسى وتحطلى قرنفل ....
- فيه حد فى الدنيا مابيحبش الشاى بالقرنفل !!!!
- أنا .... وفيه واحد تانى على فكره .... بس أنت ماتعرفوش ...
- لأ .....
- أول مره أشوفك قافل الكمبيوتر .... أنت عمرك ماقفلتله ...
- أتحرق ....
- تانى !!!!! أنت مش لسه مصلحه !!!!
- المره اللى فاتت كنت لسه منزل فيلم جميل قوى .... روحت عملت كوبايه شاى وحطيتها على المكتب قدام الكمبيوتر ....
جاى اقعد .. مااعرفش أزاى خبطت الكوبايه وقعت على الكمبيوتر سخنه مولعه .....
استنى أروح أجيب الشاى ....
قلبته بسرعه وقعدت أنشف فيه .... أنه يشتغل ... أبدا ..... وديته الصيانه فتحوه ونظفوه ... الحمد لله أشتغل .... بس
الكيبورد مش شغاله .... أشتريت كيبورد جديده .... وعدت ....
أمبارح الصبح فاتح الكمبيوتر .... أنت عارف الدنيا حر ولعه ..... مشغل فوق منه المروحه كالعاده .... افتكرت أن واحد
صاحبى كان طالب منى شويه أفلام أطفال لاولاده ..... عندى الأفلام دى على الهارد الخارجى ..... ركبت الهارد الخارجى
وحطيت الديفيدى ... وبدأت أنسخ .... مافيش ثانيه ولقيتلك الكمبيوتر عمال يطفى ويولع ... وبعدين ماحطش منطق ....
سخن طبعا جدا ... لو كسرت عليه بيضه حاتستوى فى ثانيه .....
استنيت عليه لما برد خالص ... أشغله , مش ممكن .... أتحرق ....
- وبعدين ....
- وديته الصيانه .... الماظر بورد أتحرقت .... الرئيسيه والفرعيه ..... الهارد سليم والشاشه سليمه الحمد لله .....
- صلحته ؟؟؟
- صلحت مين ... عايز مبلغ كبير مش معايا ....
- وحاتعمل أيه ؟
- لما ربنا يفرجها ابقى أصلحه ....
- وتقدر تقعد من غير كمبيوتر ؟؟
- باموت .... الوقت مش بيعدى فعلا .... أنا الكمبيوتر هو كل حياتى .... كل حاجه باعملها عليه .... ماعدا الشاى والقهوه ...
- فرصه علشان تخرج وتعيش زى البنى أدميين .... طول النهار قاعد قدامه لما حايجيلك تخلف عقلى ....
- أستنى بس لما أكملك .... المصيبه فى الماظر بورد .... المصيبه فى الهارد الخارجى ....
- أتحرق هو كمان ....
- وعليه كل حاجه .... ٥٠٠ جيجا .... صورى ومستنداتى وأفلامى وذكرياتى ....كلها راحت ....
- مايتصلحش ؟؟
- ماأعتقدتش ..... أنا حاأوديه لبتوع الهاردات .... بس ماعنديش أمل .....
- أدى اللى خدتوه من التكنولوجيا .... ياما قولتلك .... أنا مريح دماغى ... لا كمبيوتر والا نت والا قلبه دماغ ....
- أنت غلطان .... الدنيا بتتقدم .... وكل حاجه بقت بالكمبيوتر دلوقتى .... ماتقدرش تعيش من غيره ...
- أزاى ماتقدرش تعيش من غيره .... أمال أنا وغيرى ألافات عايشين أزاى !!!!
- ياإبنى أنتم مش عايشين .... أنت بتعمل أيه فى حياتك غير أنك تروح الشغل ترجع البيت تقعد قدام التليفزيون ...
ماتعرفش أيه اللى بيحصل فى الدنيا .... ماتعرفش غير اللى بتسمعه فى الأخبار ... ويادوب تتفرجلك على فيلم عربى
وتخش تنام .... حابس نفسك فى صندوق مابتخرجش منه ..... النت بيخليك تلف العالم كله .... تشوف .... تتعلم ... تلاقى
أصحابك بتوع المدرسه اللى الدنيا فرقتكم ..... تكتبلهم وتكلمهم وتشوف صورهم .....
أصحابك بتوع المدرسه اللى الدنيا فرقتكم ..... تكتبلهم وتكلمهم وتشوف صورهم .....
- بذمتك أنا اللى مش عايش !!!! أنا حياتى ملكى ... أنا اللى باتحكم فيها ... باأخرج ... باأتمشى على البحر ... باقعد على
القهوه مع أصحابى .... باقرا جرانين ومجلات وكتب .... باأطلع رحلات .... باأروح النادى ألف التراك والعب كوره ...
أنت طلعلك كرش وأتب فى ظهرك من القعده .... وماعدتش بتشوف من غير نظاره ......
- كويس .... بس برضه ماتقدرش تفضل فى مكانك والعالم كله بيطلع لقدام .... بلاش علشانا أحنا .... علشان ولادنا ....
يعنى يبقى شكلك ايه لما أبنك يسألك على حاجه تقوله مش عارف .... أنا فاكر يوم لما وريت والدى فيديو على الموبايل
كان مذهول أزاى .... أنا مش حاأبقى زيه .... أنا أعرف كمبيوتر أحسن من ولادى .... وبالرغم من أنهم كبروا , ومخهم
أحسن من مخى .... لسه بييجوا يسألونى ويتعلموا منى .... لسه أنا فى نظرهم قدوه .... الأب اللى بيعرف كل حاجه ...
- مسيرهم يوم حايعرفوا كل حاجه ... وأنت حاتنسى كل اللى تعرفه .... ربنا قال كده .....
- ساعتها حايكون غصب عنى ... سنه الحياه .... مش تقصير والا كسل منى ....
- أنا مش حاأسمح لأاولادى أنهم يضيعوا عمرهم قدام الكمبيوتر .... ويبقوا ماشيين فى الشارع مش شايفين قدامهم لانهم
فاتحين الموبايل وقاعدين يعملوا شات مع أصحابهم .....
- الحياه بتجرى ياصاحبى .. ماتقدرش توقفها .... حاتدوس عليك ... وحاتلاقى نفسك فى الأخر وحيد .... لا اصحاب على النت
تكلمهم .... والا أصحاب على القهوه تقعد معاهم .....
- أنتم اللى التكنولوجيا عزلتكم عن الناس .... زمان الناس كانوا بيكلموا بعض من البلكونات ... كانوا بيروحوا يزوروا بعض ..
كانوا بيتعرفوا على بعض فى الاتوبيسات ..... دلوقتى كل واحد دافن وشه فى الموبايل ومش شايف حاجه حوليه ... والا بيكلم
حد .... بتتكلم أنت وأصحابك على النت ولكن ماحدش فيكم حاسس بالتانى .....
التكنولوجيا دى خراب مش تقدم ..... نقمه مش نعمه ..... طب حااقولك حاجه ....
من كام يوم كنت رايح أدفع فاتوره التليفون .... واحد زميلى قالى ممكن تدفعلى فاتوره النت ... روحت أدفع الفاتوره قالى
الشبكه واقعه .... روحت عملت شويه مشاوير ورجعتله بعد ساعتين .... لسه الشبكه واقعه ... طب ياأبنى خد مننا الفلوس
سجل الأسماء فى ورقه , وأدينا إيصال بالمبلغ ... ولما الشبكه تقوم تقف على رجليها ابقى سجلنا على الكمبيوتر ....
ماينفعش ....... أدى التكنولوجيا ..... تقع الشبكه ... الدنيا كلها تقف ....
- ده بيحصل بس فى مصر .... لكن فى الدول المتقدمه النت مش بيقع .... والا الدنيا بتقف ....
- أسمع كلامى و راجع نفسك ... حياتك بتضيع منك وانت مش بتستمتع بيها .... اقفل أم الكمبيوتر وأنزل اتمشى على البحر ...
أشترى ذره مشوى وترمس .... أعمل أصدقاء حقيقيين ... خدهم وأدخلوا سينما .... اقعدوا على القهوه .... أطلب شيشه بطعم
البصاره..... هاتوا سندوتشات فول وفلافل وبتنجان مقلى ... وكبده من عند الفلاح ... هات كتب وأقراها .... روح النادى
أشترى ذره مشوى وترمس .... أعمل أصدقاء حقيقيين ... خدهم وأدخلوا سينما .... اقعدوا على القهوه .... أطلب شيشه بطعم
البصاره..... هاتوا سندوتشات فول وفلافل وبتنجان مقلى ... وكبده من عند الفلاح ... هات كتب وأقراها .... روح النادى
أجرى كل يوم شويه وأعمل تمارين ..... أرجع لحياتك قبل الكمبيوتر والنت .....
- طب أجرى معاك كل يوم شويه فى النادى ..... وبعدين تيجى معايا البيت أعلمك شويه على الكمبيوتر !!!!!!
No comments:
Post a Comment