- أنا عايز افسخ الخطوبه ...... مش حاينفع نكمل مع بعض ....
جمله قاسيه جدا كان لازم اقولهالها .... مع إنى كنت عارف إنها حاتقتلها .... بس عملت بالمثل اللى بيقول ( وجع ساعه
والا كل ساعه ) ... حاتتعب شويه وبعدين مع الأيام حاتنسى ..... أحسن ماتعيش طول عمرها مع واحد مش قادر يحبها ...
- وعملت أيه هى لما قولتلها ؟؟؟
- عيطت طبعا , بس ماإتكلمتش .... كرامتها منعتها من انها تستجدى الحب ..... هى كانت متوقعه إنى حاأعمل كده ...... لأن
معاملتى لها إتغيرت .... وكنت دايما بأشتكيلها من تصرفاتها .... بس ماكانتش عايزه تصدق بينها وبين نفسها انى حاأسيبها ..
- وأيه السبب ؟؟
- أحنا كنا زمايل فى الكليه .... كانت هى حلم كل شاب بيعرفها .... جميله جدا ... متدينه ... أخلاقها عاليه جدا .. سمعتها نظيفه
جدا .... إنسانه مرحه ودمها خفيف .... من الأخر كده مثاليه ... مافيهاش أى عيب ....
كنا أصدقاء فى حدود الكليه .... بنقعد فى مجموعات بين المحاضرات نتكلم ... غالبيه كلامنا كان بيبقى فى الدين ... مافيش أى
حوارات مبتذله او تلميحات أو لقاءات إنفراديه .... لغايه ماإتخرجنا .....
ماشوفتهاش الثلاثه سنين اللى قضيتهم فى الجيش .... بعد ماخرجت من الجيش اشتغلت فى مكتبه الجامعه فى عين شمس ..
قابلتها هناك صدفه .... كانت بتعمل دراسات عليا وبتيجى تاخد كتب من المكتبه ..... روحنا قعدنا فى الكافتيريا نتكلم ...
ماقومناش الا لما اتعاهدنا اننا نكون لبعض ....
ماقومناش الا لما اتعاهدنا اننا نكون لبعض ....
كنت حاسس انى بحلم .... كل اصحابى ماكانوش مصدقين ..... كلهم كانوا مستكترينها على ... وبيحسدونى طبعا ....
- بالوصف اللى انت بتوصفهولها ده , طبعا تبقى محظوظ جدا ....
- كنت لسه بابتدى حياتى ... ماعنديش الهوا ..... ومش مستعد طبعا لأى ارتباط ..... على عكسها هى ..... عايزه تتجوز
بسرعه وماعندهاش استعداد إنها تقعد تقابل واحد مافيش بينها وبينه علاقه رسميه علنيه .....
بدأت تضغط على علشان أتقدملها ..... حتى ولو نقرا الفاتحه بس والناس كلها تعرف ..... بينى وبينك كنت مرعوب ....
بس وافقت .... لما قالت لأهلها , قالولها مافيش حاجه اسمها فاتحه .... نشوفه , ولو كويس نعمل خطوبه علطول ....
- إتدبست .....
- طبعا إعترضت .. أنا مش قد خطوبه وشيكه ومهر ... الى أخره ....... قالتلى مش حاناخد منك مهر .... وبالنسبه للشبكه
حاأدخلك فى جمعيه أنت اللى تقبضها الاول .... وإلحاح بقى , وأنت فاهم ....
بدأت حياتى مديون .... كل مرتبى فى الجمعيه .... زيارات ومواسم وخروجات وهدايا .... واروح وارجع من الشغل ماشى
على رجليا ... ماعنديش حتى فلوس للمواصلات ..... مش عارف اشترى والا حتى جوز شرابات لنفسى .....
- مشكله فعلا .....
- مش المثل بيقول ( إن دخل الفقر من الباب , هرب الحب من الشباك ) .... دى حقيقه .... المشاكل الماديه بتسبب فى جفاف
العواطف .... عمال تفكر حااجيب منين وأعمل إيه .... حاتجيلك نفس تحب وتقول كلام عاطفى !!!!!
المهم .... طالما خطبت يبقى مسيرك حاتتجوز ..... علشان تتجوز لازم تجيب شقه ....
- مشكله كل الشباب دلوقتى ...
- أياميها ماكانتش مشكله الشقق كبيره كده .... كان فيه شقق , وماكانتش غاليه .... المشكله أنا اجيب فلوس شقه منين ....
قالتلى أنا حااسلفك .... وبعدين تبقى ترجعهوملى ....
- ورطتك أكتر وأكتر ...
- إضطريت أشتغل شغلتين ... ماكنتش بالحق أنام ... فلوس الشغله الثانيه على الفلوس اللى بتديهانى حجزت شقه على
الطوب الأحمر .... دخلنا فى محاره وتركيب ارضيه وشبابيك وبيبان وادوات صحيه وأدوات كهربائيه .......
وكل ده وهى بتستعجلنى , وبتترجانى , ومافيش كلام غير عن أمتى الشقه تخلص علشان نتجوز ....
باشتغل شغله الصبح وشغله طول الليل ... والوقت اللى المفروض أنام فيه شويه لازم نتقابل .... لو مش قادر اخرج ...
تجيلى هى البيت .....
- إتخنقت !!!
- خلاص ... ماكنتش قادر استحمل أو أكمل ...... كلمتها كتير ... فهمتها كتير .... مافيش فايده ....
وأنا لسه متخرج ... لسه ماوقفتش على رجليا ... حانكمل أزاى بالشكل ده !!!! حااتجوز وأنا مديون وباشتغل شغلتين...
وارجع البيت بدل ماأنام شويه تقولى اقعد معايا .... وبعدين نخلف ... والاولاد يدخلوا المدراس .... ومش عارف ايه ...
يعنى عمرى ماحاارفع راسى ابدا من الديون ... والا حااقدر اعيش حياه طبيعيه .....
- ده اللى خلاك تسيبها ؟؟؟
- طبعا ..... مش بدل ماأتجنن وأمشى أكلم نفسى فى الشارع !!!!
زى ماقولتلك فى الاول .... وجع ساعه والا كل ساعه ....
- وبعدين .. عملت أيه ؟؟؟
- كان لازم أهرب .... ماكنتش حااقدر اشوفها وهى مكسوره ... وهى بتتألم وبتتعذب .... أنا جرحتها جرح كبير ....
وماتنساش أن مجتمعنا مش بيرحم .... واحده زى دى , خطيبها يسيبها ليه ..... مؤلمه ....
سافرت اشتغلت فى السعوديه .... وبعد كام سنه إتجوزت وخلفت .... لغايه مارجعت استقريت فى مصر بعد تسعتاشر
سنه ..... كانت أول مره اشوفها من ساعه ماسيبنا بعض ..... إتجوزت هى كمان وخلفت .....لسه جميله زى ماهى ....
وشكلها مااتغيرش ... كأنها مش بتكبر .... بس فيه حزن فى عنيها .... بتحاول تخبيه بإبتسامتها الحلوه ....
- إتجوزت مين وامتى وعامله إيه ؟؟؟
- مارضيتش أسألها ..... كل اللى قولتهولها .... سامحينى ....
- وقالتك أيه ....
- قالتلى أنا سامحتك من زمان .... ده حقيقى .... هى دى الانسانه اللى أعرفها .... قلبها مليان حب لكل الناس ... ومش
بتعرف تشيل فى قلبها لاى حد , مهما اتجرحت .....
- ندمان ؟
- جدا ....
شايف الساعه اللى فى ايدى دى !!!! هى اللى جابتهالى فى أول عيد ميلاد لى معاها ......
عارف بقالها كام سنه فى إيدى !!!!! ثلاثين سنه بالظبط .... ماقلعتهاش من إيدى والا مره .....
- لسه بتفكر فيها ؟
- بادور عليها فى كل حته أروحها ....
- وعايز منها أيه ؟؟
- فى الدنيا ...... والا حاجه ..... بس طلبت من ربنا أنه يجوزهالى فى الجنه .
No comments:
Post a Comment